Ommaviy taklif

OMMAVIY OFERTA
chakana savdo va/yoki xizmatlar ko‘rsatish haqida

O‘zbekiston Respublikasi Fuqarolik kodeksining 367-369-moddalari va 426-moddasiga muvofiq, ushbu hujjat "Eman" MChJ (keyingi o‘rinlarda – Sotuvchi) tomonidan cheklanmagan miqdordagi shaxslarga (keyingi o‘rinlarda – Xaridor/Xaridorlar) chakana savdo shartnomasini tuzish bo‘yicha taklif hisoblanadi.
"Eman" MChJ ushbu Ommaviy ofertaning shartlariga o‘zgartirishlar kiritish huquqini o‘zida saqlab qoladi. Ushbu Ommaviy ofertaning shartlari barcha fuqarolik-huquqiy munosabatlar ishtirokchilari uchun yagona hisoblanadi.
Sotuvchi ushbu Ommaviy ofertaning shartlariga o‘zgartirish kiritish huquqiga ega. Barcha o‘zgarishlar Sotuvchining rasmiy veb-saytida https://dafna.uz/ manzilida e’lon qilingan paytdan boshlab kuchga kiradi. Xaridorning amaldagi Ommaviy oferta bilan muntazam tanishib borishi uning majburiyati hisoblanadi.
Ushbu ofertaning shartlarini qabul qilgan holda, Xaridor hech qanday istisnosiz va to‘liq hajmda ushbu shartlarga rozilik bildiradi.
1. Atamalar va ta’riflar
1.1. Chakana savdo – Xaridorga tijorat maqsadlarida foydalanish huquqisiz, faqat yakuniy iste’mol uchun mo‘ljallangan mahsulotlarni naqd pul, bank plastik kartalari (korporativ bank kartalaridan tashqari) yoki kontaktsiz onlayn to‘lov tizimlari orqali ulgurji yoki kichik hajmlarda sotish faoliyati.
1.2. Mahsulot – Sotish ob’ekti (buyum) bo‘lib, fuqarolik muomalasidan chiqarilmagan va unda ishtirok etish cheklanmagan, Sotuvchining savdo obyektlari va veb-saytida sotuvga qo‘yilgan mahsulot.
1.3. Savdo obyekti – "DAFNA" brendi ostidagi shourumlar va savdo nuqtalari bo‘lib, "Eman" MChJga tegishli va quyidagi havolada ko‘rsatilgan manzillarda joylashgan: https://dafna.uz/contacts .
1.4. Savdo zali – tijorat obyekti hududi bo‘lib, keng assortimentdagi mahsulotlarni taqdim etish va chakana savdoni amalga oshirish uchun mo‘ljallangan maydon.
1.5. Sayt – Sotuvchining rasmiy internet-sayti: https://dafna.uz/.
1.6. Call-markaz – Sotuvchining bo‘limi bo‘lib, buyurtmalarni qabul qilish va mijozlarga ovozli aloqa kanallari orqali ma’lumot berish faoliyatini amalga oshiradi, telefon raqami: +998 78 555 33 55 (1408).
1.7. Buyurtma – Xaridor tomonidan Sotuvchining veb-sayti yoki call-markazi orqali tanlangan va buyurtma qilingan mahsulotlarning ayrim pozitsiyalari (pozitsiyasi).
1.8. Yetkazib berish xizmati – Sotuvchining xodimlari yoki uning vakillari bo‘lib, ular mahsulotlarni Xaridorga yetkazib berish faoliyatini amalga oshiradilar.
1.9. Xaridor – tijorat maqsadlarida foydalanish huquqisiz, faqat shaxsiy, oilaviy, maishiy yoki boshqa ehtiyojlar uchun mahsulot sotib olish niyatiga ega bo‘lgan jismoniy shaxs.

2. Umumiy qoidalar
2.1. Ushbu Ommaviy oferta Sotuvchi va Xaridor o‘rtasidagi munosabatlarni tartibga soladi, Tovarlarni chakana sotish va/yoki xizmatlar ko‘rsatish tartibini belgilaydi hamda jismoniy shaxslarga qaratilgan Sotuvchining rasmiy taklifi hisoblanadi. Sotuvchi Xaridorga savdo obyektlarida va Sotuvchining Saytida taqdim etilgan tovar va/yoki xizmatlarni (keyingi o‘rinlarda – «Tovarlar») ushbu Ommaviy ofertada keltirilgan shartlar asosida sotib olishni taklif qiladi.
Xaridor ushbu Oferta shartlarini qabul qilganda (akseptda, 2.2-band) Sotuvchi va Xaridor o‘rtasida tovar oldi-sotdi shartnomasi tuziladi, uning predmeti Tovarlardir. Ushbu Ommaviy oferta shartnoma hisoblanmaydi: u shunday shartnoma tuzish haqidagi taklifdir. Xaridor xarid qilgan bo‘lsa – buyurtma bergan, uni tasdiqlagan, Tovar uchun to‘lagan yoki Tovarni olgan bo‘lsa – Oferta qabul qilingan hisoblanadi.
2.2. Aksept – Xaridorning Sotuvchi tomonidan taklif qilingan shartlarda tovar sotib olish niyatini tasdiqlashi bo‘lib, Xaridor ushbu shartlarni qabul qiladi va quyidagi usullardan biri orqali ularga qo‘shiladi:
•    Saytda buyurtma berish jarayonining oxirgi bosqichida «Buyurtmani rasmiylashtirish» tugmasini bosish orqali;
•    Saytda mustaqil ravishda ro‘yxatdan o‘tish orqali;
•    Call-markaz orqali telefon orqali buyurtmani tasdiqlash orqali;
•    Tovar va/yoki xizmat uchun to‘lovni amalga oshirish orqali;
•    Tovar topshirish-hisobga olish dalolatnomasida Xaridor tomonidan qo‘yilgan imzo va "Ommaviy oferta shartlari bilan tanishdim va qabul qildim" belgisini qo‘yish orqali.
2.3. Sotuvchi va Xaridor birgalikda – «Tomonlar», har biri alohida – «Tomon» deb yuritiladi.
2.4. Sotuvchi ushbu Ommaviy oferta shartlariga bir tomonlama o‘zgartirish kiritish huquqini o‘zida saqlab qoladi. Kiritilgan har qanday o‘zgartirish Sotuvchining rasmiy veb-saytida e’lon qilingan paytdan boshlab kuchga kiradi.

3. Savdo shartlari
3.1. Tovarlar va xizmatlarning narxlari Sotuvchining savdo obyektlarida tegishli narx belgilari orqali ko‘rsatilgan bo‘lib, ular Sotuvchining rasmiy sahifalarida va Saytida ham e’lon qilinishi mumkin.
3.2. Sotuvchi Xaridor bilan oldindan kelishmagan holda Tovar va Xizmatlar narxini o‘zgartirish huquqiga ega.
3.3. Sotuvchi istalgan vaqtda Tovar va Xizmatlar assortimentini o‘zgartirish, shuningdek, ularning savdosini to‘xtatish yoki butunlay bekor qilish huquqiga ega va bu haqda Xaridorga oldindan xabar berish majburiyatiga ega emas.
3.4. Agar Xaridor ushbu Ommaviy oferta shartlarini bajarmasa yoki uning harakatlarining qonuniyligiga nisbatan asosli shubhalar tug‘ilsa, Sotuvchi Tovar va/yoki Xizmatni sotishdan bosh tortish huquqiga ega.

4. Tovar va Xizmat uchun to‘lov tartibi
4.1. Xaridor Tovar va/yoki Xizmat uchun quyidagi usullardan biri orqali to‘lovni amalga oshirishi mumkin:
•    naqd pul orqali;
•    naqd pulsiz hisob-kitob tizimlari orqali (Uzum, Click, Payme, Solfy, Uzum Nasiya,  ZoodPay, bank o‘tkazmalari);
•    bank to‘lov kartasi orqali;
•    Sotuvchining savdo obyektida qabul qilinadigan boshqa to‘lov usullari orqali.
Shuningdek, to‘lov Sotuvchi tomonidan qo‘llab-quvvatlanadigan onlayn to‘lov tizimlari orqali amalga oshirilishi mumkin.
4.1.1. To‘lov tizimlarining texnik muammolari uchun mas’uliyat cheklovi
Sotuvchi Payme, Click va boshqa bank to‘lov terminallari orqali to‘lovni amalga oshirishning imkonsizligi uchun javobgar emas, agar bu holat quyidagi sabablar tufayli yuzaga kelgan bo‘lsa:
•    tegishli to‘lov tizimlari tomonidan texnik nosozliklar yuzaga kelishi;
•    to‘lov tizimlarining profilaktik ishlari o‘tkazilishi;
•    bank kartalarining ishlashida muammolar yoki telekommunikatsiya tizimlari bilan bog‘liq muammolar yuzaga kelishi.
4.2. Tovar va Xizmat uchun to‘lov faqat O‘zbekiston Respublikasi milliy valyutasi (so‘m, UZS) da amalga oshiriladi.
4.3. Solfy, Uzum Nasiya, ZoodPay orqali to‘lovni bo‘lib-bo‘lib to‘lash shartlari va mijozlarga taqdim etiladigan mukofot dasturi bilan batafsil tanishish uchun Sotuvchining quyidagi veb-saytiga murojaat qiling:
•    https://dafna.uz/page/solfy,
•    https://dafna.uz/page/nasiya,
•    https://dafna.uz/page/zoodpay,
•    https://dafna.uz/page/partnership.
4.4. Tovar uchun to‘lov Buyurtmani rasmiylashtirish usulidan (Saytda, Call-markaz orqali yoki Savdo obyektida) qat’i nazar, Tovar Xaridorga topshirilgunga qadar uning qiymatining 100 foizi miqdorida amalga oshiriladi (keyingi o‘rinlarda – «Oldindan to‘lov»). Oldindan to‘lov Tovar narxi hisobiga o‘tkaziladi va bayona hisoblanmaydi. Tovarni yetkazib berish va topshirish Oldindan to‘lov kelib tushgandan keyin amalga oshiriladi.
5. Buyurtma rasmiylashtirish va yetkazib berish
5.1. Xaridor buyurtmani quyidagi usullardan biri orqali rasmiylashtirishi mumkin:
•    Sayt orqali buyurtma berish;
•    Call-markaz orqali buyurtma berish.
5.2. Xaridor buyurtmani veb-sayt orqali rasmiylashtirish uchun "Katalog" bo‘limidan mos mahsulotni tanlashi, kerakli miqdorda belgilashi va savatchaga qo‘shishi lozim. Ikki yoki undan ortiq mahsulot buyurtma qilinganida, ushbu harakat har bir mahsulot pozitsiyasi uchun alohida bajarilishi kerak.
Shundan so‘ng, Xaridor "Savatcha" bo‘limiga o‘tishi, buyurtma qilingan mahsulotlar soni va ro‘yxatini tekshirishi (kerak bo‘lsa, ma’lumotlarni o‘zgartirishi) va "Buyurtmani rasmiylashtirish" tugmasini bosishi lozim. Keyingi ochilgan sahifada shaxsiy ma’lumotlar, yetkazib berish manzili, yetkazib berish hududi va to‘lov usulini to‘ldirish kerak. So‘ng, "Rasmiylashtirish" tugmasini bosish orqali buyurtma yakunlanadi.
"Rasmiylashtirish" tugmalarini bosish orqali Xaridor buyurtmani yakunlaydi. Shundan so‘ng, Sotuvchi xodimlari, zarur bo‘lsa, buyurtmani tasdiqlash yoki to‘g‘rilash uchun Xaridor bilan bog‘lanishi mumkin. Shundan keyin, Xaridor ushbu Ofertaning 4.4-bandiga muvofiq Oldindan to‘lovni amalga oshiradi.
5.3. Buyurtmani rasmiylashtirishda Xaridor quyidagi ma’lumotlarni taqdim etishi shart:
•    F.I.Sh.;
•    Aloqa telefoni;
•    Elektron pochta manzili (ixtiyoriy);
•    Yetkazib berish manzili (shahar, ko‘cha, uy, bino/korpus, kvartira/ofis raqami, kirish eshigi, qavat, domofon kodi, qo‘shimcha sharhlar);
•    Sharh va promo-kod (zarur bo‘lsa).
5.4. Xaridor buyurtma berishda taqdim etgan ma’lumotlarning to‘g‘riligiga o‘zi javobgardir. Agar noto‘g‘ri manzil, telefon raqami yoki boshqa noto‘g‘ri ma’lumotlar kiritilgan bo‘lsa, Sotuvchi ushbu sabablarga ko‘ra buyurtmaning bajarilmasligi yoki yetkazib berilmasligi uchun javobgar emas.
5.5. Xaridor buyurtmani quyidagi usullardan biri orqali olishi mumkin:
•    Sotuvchining yetkazib berish xizmati orqali yetkazib berish;
•    Sotuvchining savdo obyektiga kelib, buyurtmani o‘zi olib ketish.
Agar buyurtma xizmat ko‘rsatishga tegishli bo‘lsa, Xaridor Sotuvchining savdo obyektiga kelib, xizmatdan foydalanishi kerak.
5.6. Tovarni yetkazib berish shartlari
5.6.1. Yetkazib berish Oldindan to‘lov (4.4-band) amalga oshirilgandan keyin, Toshkent shahrida soat 9:00 dan 18:00 gacha amalga oshiriladi. Yetkazib berish Buyurtma summasi kamida 1 000 000 (bir million) so‘m bo‘lganda bepul va bir marta amalga oshiriladi, bunda Xaridor ushbu Ofertaning 5.6.2–5.6.10 va 5.6.13-bandlari talablariga rioya qilishi shart. Buyurtma summasi 1 000 000 so‘mdan kam bo‘lsa, Sotuvchi yetkazib berishni amalga oshirmaydi: Xaridor Tovarni o‘zi olib ketishi yoki uchinchi tomon tashuvchilar (kuryer xizmatlari) xizmatlaridan o‘z hisobidan foydalanishi mumkin.
Yetkazib berish muddati:
- Agar mahsulot Sotuvchining omborida mavjud bo‘lsa, Tovar uchun to‘lov amalga oshirilgan paytdan boshlab 3 (uch) ish kuni ichida yetkazib beriladi.
- Agar mahsulot omborda mavjud bo‘lmasa yoki Xaridor tomonidan individual buyurtma qilingan bo‘lsa, yetkazib berish muddati Xaridor bilan alohida kelishiladi.
5.6.2. Buyurtma rasmiylashtirilayotganda Xaridor menejerga yetkazib berish manzilining aniq manzili va lokatsiyasini (geolokatsiyasini), asosiy va qo‘shimcha aloqa raqamlarini (usta, прораб, ishchi, qarindosh), shuningdek, yetkazib berish joyiga kirish sharoitlari haqida to‘liq va ishonchli ma’lumotlarni taqdim etishi shart. Bunga qavat, lift mavjudligi (yo‘lovchi va/yoki yuk lifti), uning sozligi hamda Tovarni olib chiqishda foydalanish imkoniyati kiradi.
Xaridor taqdim etilgan ma’lumotlarning to‘liqligi va ishonchliligi, shuningdek, Tovarni yetkazib berish va ichkariga olib kirish uchun zarur sharoitlarni ta’minlash uchun javobgar hisoblanadi.
5.6.3. Yetkazib berishdan oldin logistika bo‘limi xodimi Xaridorga qo‘ng‘iroq qilib, jo‘nash haqida xabar beradi. Ushbu xabar berilgan paytdan boshlab Xaridor ko‘rsatilgan telefon raqamlari orqali aloqada bo‘lishi va yetkazib berish manzilida Tovarni qabul qilishni ta’minlashi shart.
5.6.4. Agar transport vositasi yetkazib berish manziliga yetib kelganda yoki kuryer qo‘ng‘iroq qilganda 20 daqiqa ichida Xaridor ham, u ko‘rsatgan qo‘shimcha aloqa shaxsi ham qo‘ng‘iroqlarga javob bermasa yoki Tovarni qabul qilishni ta’minlamasa, bepul yetkazib berish bekor qilinadi va boshqa sanalarga ko‘chirilmaydi. Bekor qilish oqibatlari ushbu Ofertaning 5.6.8-bandida belgilangan.
5.6.5. Tovarni topshirish joyi – Buyurtmada ko‘rsatilgan yetkazib berish manzili bo‘yicha podyezdga (binoga) kirish joyi, xususiy uy uchun – kirish darvozasi (eshigi). Yetkazib berish xizmati Tovarni transport vositasidan tushiradi va Xaridorga shu joyda topshiradi. Tovarni topshirish joyidan tashqariga olib kirish (podyezdga, qavatga, kvartira/ofis/xonaga) bepul yetkazib berish narxiga kirmaydi va 5.6.11-bandga muvofiq alohida xizmat sifatida ko‘rsatiladi.
5.6.6. Firibgarlik holatlarining oldini olish uchun oldindan to‘langan mahsulotni topshirish vaqtida Yetkazib berish xizmati xodimi Xaridordan shaxsini tasdiqlovchi hujjat taqdim etishini talab qilish huquqiga ega. Sotuvchi Xaridordan olingan shaxsiy ma’lumotlarning maxfiyligi va himoyasini kafolatlaydi.
5.6.7. Yetkazib berish va yuklab jo‘natishning batafsil shartlari bilan Siz Sotuvchining quyidagi manzilda joylashtirilgan Tovar yetkazib berish bo‘yicha Kelishuvida tanishishingiz mumkin: https://dafna.uz/page/delivery.
5.6.8. Ushbu Ofertaning 5.6.4, 5.6.9, 5.6.10 va 5.6.13-bandlarida nazarda tutilgan asoslar bo‘yicha bepul yetkazib berish bekor qilingan taqdirda, Tovar Sotuvchining ofisiga (omboriga) qaytariladi. Xaridor Tovarni menejer bilan kelishilgan sana va vaqtda o‘zi olib ketishi mumkin.
5.6.8.1. Agar yetkazib berish Xaridorning aybi bilan (5.6.8-bandda ko‘rsatilgan asoslar bo‘yicha) amalga oshmasa va Xaridor Tovardan voz kechsa, Sotuvchi Oldindan to‘lov summasidan yetkazib berishni tashkil etish uchun 100 000 (yuz ming) so‘m miqdorida qat’iy belgilangan haqni ushlab qoladi. Xaridorning individual buyurtmasi bo‘yicha buyurtma qilingan Tovardan voz kechilganda, ko‘rsatilgan summa o‘rniga Sotuvchi Tovar qiymatining 30 foizigacha (o‘ttiz foizgacha) miqdorni ushlab qolishga haqli. Oldindan to‘lovning qolgan qismi ushbu Ofertaning 6.7-bandida belgilangan tartibda qaytariladi. Pul mablag‘larini qaytarish uchun asos – Xaridorning Tovardan voz kechish sababi ko‘rsatilgan yozma arizasi (6.3 va 6.7-bandlar).
5.6.9. Agar Xaridor noto‘g‘ri ma’lumotlarni (noto‘g‘ri telefon raqami, noto‘g‘ri manzil yoki lokatsiya) ko‘rsatgan bo‘lsa, bepul yetkazib berish bekor qilinadi (oqibatlari – ushbu Ofertaning 5.6.8-bandi).
5.6.10. Xaridor tomonidan Yetkazib berish xizmatining dastlabki qo‘ng‘irog‘i vaqtida yoki yetkazib berish kuni xabar qilingan manzil, lokatsiya, aloqa ma’lumotlari va yetkazib berishning boshqa shartlaridagi o‘zgartirishlar qabul qilinmaydi va hisobga olinmaydi. Agar Buyurtmada ko‘rsatilgan manzilga yetib kelgach, Xaridor xato manzil yoki lokatsiya ko‘rsatganini tasdiqlasa, bepul yetkazib berish bekor qilinadi (oqibatlari – ushbu Ofertaning 5.6.8-bandi).
5.6.11. Tovarni qavatga ko‘tarish va Tovarni topshirish joyidan (5.6.5-band) tashqariga olib kirish xizmati bepul yetkazib berishga kirmaydi va Xaridorning buyurtmasi bo‘yicha Buyurtma rasmiylashtirilayotganda kelishilgan shartlarda alohida xizmat sifatida ko‘rsatiladi. Ushbu xizmat Xaridor tomonidan Buyurtma rasmiylashtirilayotganda ko‘rsatilgan lift va ko‘tarish shartlari to‘g‘risidagi ma’lumotlarga asoslanib ko‘rsatiladi. Ushbu xizmatni ko‘rsatish uchun Xaridor quyidagilarni ta’minlaydi: Tovar olib kiriladigan yo‘ldagi eshik o‘rinlarining kengligi kamida 90 sm va balandligi kamida 200 sm bo‘lishi; yo‘laklar, koridorlar va zinapoya maydonchalari mebel, buyumlar va boshqa to‘siqlardan xoli bo‘lishi. O‘tish joylarini bo‘shatish va to‘siqlardan tozalash Yetkazib berish xizmati vazifalariga kirmaydi va Xaridor tomonidan xodimlar kelishidan oldin bajariladi. Agar ushbu talablar bajarilmasa, shuningdek amalda lift mavjud bo‘lmasa, nosoz bo‘lsa yoki Tovarni ko‘tarish uchun foydalanib bo‘lmasa, Sotuvchi ko‘tarish xizmatini ko‘rsatishdan bosh tortish yoki uning narxini har bir qavat uchun 25 000 (yigirma besh ming) so‘m hisobidan qayta hisoblash huquqiga ega; qayta hisoblangan xizmat Xaridorning roziligi bilan ko‘rsatiladi. Olib kirishdan bosh tortish yetkazib berishdan bosh tortish hisoblanmaydi: bepul yetkazib berish bekor qilinmaydi, Tovar yetkazib berilgan hisoblanadi va 5.6.5-bandda belgilangan topshirish joyida Xaridorga topshiriladi, 5.6.8-band oqibatlari yuzaga kelmaydi.
5.6.12. Agar Tovarni topshirish Xaridorga bog‘liq holatlar tufayli (jumladan, ushbu Ofertaning 5.6.4, 5.6.9, 5.6.10 va 5.6.13-bandlarida nazarda tutilgan asoslar bo‘yicha) amalga oshmasa, Tovarni topshirish muddati Sotuvchi tomonidan buzilgan hisoblanmaydi, Sotuvchi esa bunday ijro etilmaslik oqibatlari uchun javobgar bo‘lmaydi.
5.6.13. Xaridor Yetkazib berish xizmati transportining to‘siqsiz o‘tishini va 5.6.5-bandda belgilangan Tovarni topshirish joyiga kirishni (shlagbaum, to‘xtash joyi, yo‘l kengligi va h.k.) ta’minlaydi.
Agar shu sabablarga ko‘ra Tovarni topshirish joyida topshirish imkoni bo‘lmasa, bepul yetkazib berish bekor qilinadi (oqibatlari – ushbu Ofertaning 5.6.8-bandi). Bino, kvartira yoki ofis ichidagi eshik o‘rinlari, o‘tish joylari va xonalarning holati bepul yetkazib berish shartlariga ta’sir qilmaydi: ularga qo‘yiladigan talablar faqat olib kirish xizmatiga (5.6.11-band) tegishli.
5.6.14. Tovarni topshirish qabul qilish-topshirish dalolatnomasi (yuk xati) bilan rasmiylashtiriladi, uni Xaridor (yoki Tovarni qabul qiluvchi u ko‘rsatgan shaxs) va Yetkazib berish xizmati vakili imzolaydi. Qabul qilishda Xaridor Yetkazib berish xizmati vakili huzurida Tovarni ko‘zdan kechirishi, uning Buyurtmaga muvofiqligini, to‘liq komplektligini va shikastlanishlar yo‘qligini tekshirishi hamda aniqlangan e’tirozlarni dalolatnomada ko‘rsatishi shart. Tovar topshirilgan hisoblanadi, Tovarning tasodifan nobud bo‘lishi yoki shikastlanishi xavfi esa dalolatnoma 5.6.5-bandda belgilangan topshirish joyida (5.6.11-band bo‘yicha xizmat ko‘rsatilganda – ushbu xizmat ko‘rsatilgan joyda) imzolangan paytdan boshlab Xaridorga o‘tadi. Shu paytgacha bu xavfni Sotuvchi o‘z zimmasida ko‘taradi, shu jumladan Yetkazib berish xizmatining Tovarni tushirish va olib kirish chog‘idagi harakatlari uchun. Agar Xaridor asosli sababsiz dalolatnomani imzolashdan bosh tortsa, Yetkazib berish xizmati vakili dalolatnomada rad etilganligi haqida belgi qo‘yadi va Tovar holatini foto yoki video orqali qayd etish huquqiga ega. Ushbu band qoidalari Xaridorning qabul qilish chog‘ida aniqlash imkoni bo‘lmagan Tovar nuqsonlari bo‘yicha O‘zbekiston Respublikasi qonunchiligida belgilangan tartibdagi huquqlarini cheklamaydi.

6. Tovarni almashtirish va qaytarish tartibi
6.1. Xaridor Tovarni qabul qilib olayotganda, uning buyurtmaga muvofiqligi, to‘liq komplektligi va tashqi ko‘rinishida nuqson yo‘qligini tekshirishi kerak.
Xaridor Tovarni qabul qilib olganidan keyin uning tashqi ko‘rinishi va komplektligi bo‘yicha da’volar qabul qilinmaydi.
6.2. «Iste’molchilarning huquqlarini himoya qilish to‘g‘risida»gi O‘zbekiston Respublikasi Qonunining 18-moddasiga muvofiq Xaridor sotib olingan sifatli Tovarni xarid qilingan kundan boshlab 10 (o‘n) kun ichida Sotuvchida o‘xshash Tovarga almashtirish huquqiga ega. Agar almashtirish amalga oshirilsa va narx farqi mavjud bo‘lsa, Xaridor va Sotuvchi ushbu farqni hisob-kitob qilishlari lozim.
6.2.1. O‘xshash Tovar deb xarid qilingan Tovar bilan bir xil tovar guruhiga va vazifaga ega bo‘lgan (masalan, kreslo – kreslo, divan – divan), undan o‘lchami, shakli, gabaritlari, fasoni, rangi yoki komplektatsiyasi bilan farq qiladigan Tovar tan olinadi. Boshqa tovar guruhiga mansub yoki boshqa vazifaga ega Tovar o‘xshash hisoblanmaydi.
6.2.2. Xaridor murojaat qilganda Sotuvchi unga murojaat kuni sotuvda mavjud o‘xshash Tovarlarni taklif qiladi. Agar bunday Tovarlar mavjud bo‘lib, Xaridor ularning birortasini ham sotib olishni istamasa, Sotuvchi Tovarni almashtirishdan va to‘langan summani qaytarishdan bosh tortishga haqli («Iste’molchilarning huquqlarini himoya qilish to‘g‘risida»gi Qonunning 18-moddasi). Xarid qilingan Tovar Xaridorda qoladi.
6.2.3. Agar murojaat kuni sotuvda o‘xshash Tovar mavjud bo‘lmasa, Xaridor xarid qilingan Tovarni Sotuvchiga qaytarib, uning uchun to‘langan pul mablag‘ini qaytarib olishi mumkin.
6.3. Tovarni almashtirish yoki qaytarish va pul mablag‘larini qaytarish uchun asos – Xaridorning pul mablag‘larini qaytarish (almashtirish) to‘g‘risidagi yozma arizasi (xati) bo‘lib, unda qaytarish sababi albatta ko‘rsatilishi va Tovarning fotosuratlari ilova qilinishi shart. Ariza Xaridorning Tovardan voz kechganligi faktini va sanasini qayd etadi. Ariza taqdim etilmasa yoki unda sabab ko‘rsatilmasa, Sotuvchi talabni rad etish huquqiga ega.
6.4. Xaridorning almashtirish yoki qaytarish talabi quyidagi shartlar bajarilgan taqdirda qabul qilinadi:
•    Tovar ishlatilmagan bo‘lishi kerak;
•    Tovarning tashqi ko‘rinishi, iste’mol xususiyatlari, muhr va yorliqlari saqlangan bo‘lishi kerak;
•    Tovarning o‘lchami dastlabki sotib olingan holatga mos bo‘lishi kerak (agar qirqish xizmati ko‘rsatilgan bo‘lsa, bunday tovar qaytarilmaydi);
•    Tovar Sotuvchidan sotib olinganligini tasdiqlovchi hujjatlar mavjud bo‘lishi kerak;
•    O‘zbekiston Respublikasi Vazirlar Mahkamasining 2003-yil 13-fevraldagi 75-son qaroriga muvofiq qaytarish va almashtirishga yaroqsiz mahsulotlar ro‘yxatiga kirmasligi kerak.
6.4.1. Sifatli Tovarni qaytarish yoki almashtirish faqat zavod qadog‘ida, to‘liq komplektda va foydalanish izlarisiz qabul qilinadi; kreslolar yig‘ilgan holda qaytariladi. Tovarni qabul qilishda tekshirish uchun qadoqni ochish foydalanish izi hisoblanmaydi.
6.5. Xaridor Tovarni Sotuvchidan sotib olganligini tasdiqlash uchun kassa cheki yoki boshqa to‘lov tasdiqlovchi hujjatni taqdim etishi kerak.
6.6. Qaytarilishi kerak bo‘lgan Tovar dastlab sotib olingan savdo obyektiga qaytarilishi lozim. Xaridor kassa cheki yoki boshqa to‘lov hujjatini taqdim qilishi shart.
6.7. Pul mablag‘larini qaytarish faqat Xaridorning qaytarish sababi ko‘rsatilgan yozma arizasi asosida, Sotuvchi namunasi bo‘yicha yoki erkin shaklda amalga oshiriladi. Pul mablag‘larini qaytarish to‘lov amalga oshirilgan usul bilan bir xil tarzda amalga oshiriladi.
Agar mahsulot bank kartasi orqali to‘langan bo‘lsa, mablag‘ aynan xuddi shu karta hisob raqamiga qaytariladi.
Sotuvchi, Xaridorning roziligi va mavjud sodiqlik kartasi mavjud bo‘lgan taqdirda, qaytarilishi lozim bo‘lgan summani Xaridorning sodiqlik kartasiga teng miqdorda o‘tkazish huquqiga ega.
6.8. Xaridorning tashabbusi bilan almashtirilayotgan yoki qaytarilayotgan sifatli Tovarni tashish xarajatlarini Xaridor ko‘taradi. Agar almashtirish yoki qaytarish Tovarning sifatsiz sotilishi (brak, nuqson) yoki Sotuvchining aybi bilan Tovarning Buyurtmaga mos kelmasligi (noto‘g‘ri tovar yuborilishi, komplektning to‘liq emasligi) bilan bog‘liq bo‘lsa, Tovarni tashish xarajatlarini Sotuvchi ko‘taradi va tasdiqlovchi hujjatlar asosida Xaridorga qoplaydi.

7. Huquq va majburiyatlar
7.1. Xaridorning huquqlari:
•    Tovar haqida to‘g‘ri va to‘liq ma’lumot olish.
•    Tovarning sifatli bo‘lishini talab qilish.
•    Tovarning xavfsiz bo‘lishini talab qilish.
•    Mazkur Oferta va O‘zbekiston Respublikasi qonunchiligiga muvofiq qaytarish shartlariga javob beruvchi tovarni qaytarish huquqiga ega bo‘lish.
•    O‘zbekiston Respublikasi amaldagi qonunchiligida belgilangan boshqa huquqlardan foydalanish.
7.2. Sotuvchining huquqlari:
•    Xaridorni oldindan xabardor qilmasdan, istalgan vaqtda ushbu Ommaviy ofertaning shartlarini o‘zgartirish.
•    Xaridorni xabardor qilmasdan tovarning ta'rifi, xususiyatlari, nomlanishi, tashqi ko‘rinishi va komplektatsiyasini o‘zgartirish.
•    Xaridor sotib olishi mumkin bo‘lgan tovar miqdoriga cheklovlar qo‘yish.
•    Amaldagi qonunchilikka muvofiq tovarni qaytarishdan bosh tortish.
7.3. Xaridorning majburiyatlari:
•    Mazkur Oferta va O‘zbekiston Respublikasi qonunchiligida belgilangan qoidalar va talablarni bajarish.
•    Savdo zalida video tasvirga olish faqat professional maqsadlarda amalga oshirilishi mumkin. Bunday tasvirga olish uchun avvaldan yozma ravishda ma’muriyatni xabardor qilish va ruxsat olish talab etiladi.

8. Tomonlarning javobgarligi
8.1. Tomonlar ushbu Ommaviy oferta shartlari va O‘zbekiston Respublikasi amaldagi qonunchiligiga muvofiq o‘z majburiyatlarini bajarmagan yoki lozim darajada bajarmaganliklari uchun javobgarlikni o‘z zimmalariga oladilar.
8.2. Tomonlar fors-major holatlari (tabiiy ofatlar, urush, davlat hokimiyati organlarining harakatlari va boshqalar) yuz bergan taqdirda, ushbu holatlar tegishli organlar tomonidan hujjatlashtirilgan bo‘lsa, Oferta shartlarini bajarishdan ozod qilinadilar.
8.3. Sotuvchi o‘zi Buyurtmani bajarishga jalb etmagan uchinchi shaxslarning (jumladan, to‘lov tizimlari, banklar, aloqa operatorlari, shuningdek Xaridor 5.6.1-bandga muvofiq mustaqil tanlagan tashuvchilar va kuryer xizmatlarining) harakatlari yoki harakatsizligi uchun javobgar emas. Sotuvchi Buyurtma bo‘yicha majburiyatlarni bajarishga jalb etgan shaxslarning (jumladan, Yetkazib berish xizmatining va Sotuvchi yetkazib berish uchun jalb etadigan tashqi tashuvchilarning) harakatlari uchun Xaridor oldida o‘z harakatlari kabi javob beradi. Uchinchi shaxslarni jalb etish Sotuvchini javobgarlikdan ozod etmaydi va Xaridorning talablarini bevosita Sotuvchiga, shu jumladan sudda, qo‘yish huquqini cheklamaydi.
8.4. Xaridor tomonidan Tovarning xususiyatlari yoki parametrlari noto‘g‘ri tanlangani sababli yuzaga kelgan oqibatlar uchun Sotuvchi javobgar emas.
8.5. Tomonlar o‘rtasida kelib chiqadigan nizolar muzokaralar yo‘li bilan hal etiladi. Agar kelishuvga erishilmasa, nizolar Sotuvchining joylashgan manzili bo‘yicha sud tartibida ko‘rib chiqiladi.
8.6. Agar Xaridor sifatli Tovar va/yoki xizmatni Sotuvchining ushbu Oferta shartlarini buzishi bilan bog‘liq bo‘lmagan sabablarga ko‘ra qabul qilishdan bosh tortsa, Sotuvchi Oldindan to‘lovni 5.6.8.1-bandga muvofiq ushlab qolinadigan summalarni (rad etish Xaridorning aybi bilan amalga oshmagan yetkazib berish bilan bog‘liq bo‘lsa), qolgan hollarda esa o‘zining haqiqatda ko‘rgan va hujjat bilan tasdiqlangan xarajatlari (jumladan, yetkazib berish va individual buyurtma bo‘yicha Tovarni tayyorlash xarajatlari) chegirib tashlangan holda qaytaradi. Agar rad etish Sotuvchining ushbu Oferta shartlarini buzishi (jumladan, Tovarni topshirish muddatining buzilishi, sifatsiz yoki Buyurtmaga mos kelmaydigan Tovar topshirilishi, Buyurtmani bajarishning imkonsizligi) sababli yuzaga kelgan bo‘lsa, Oldindan to‘lov Xaridorga to‘liq qaytariladi. Qaytarish 6.7-bandda nazarda tutilgan tartibda amalga oshiriladi.

9. Maxfiylik siyosati va shaxsiy ma’lumotlarni himoya qilish
9.1. Sotuvchi Xaridor tomonidan taqdim etilgan shaxsiy ma’lumotlarni qayta ishlash va saqlash huquqiga ega bo‘lib, Xaridor ushbu Oferta shartlariga qo‘shilish orqali o‘z roziligini bildiradi. Sotuvchi ushbu ma’lumotlarning maxfiyligini ta’minlaydi va uchinchi shaxslarga taqdim etmaydi, bundan ushbu Oferta va O‘zbekiston Respublikasining amaldagi qonunchiligida nazarda tutilgan holatlar mustasno.
9.2. Oferta shartlariga rozi bo‘lish orqali Xaridor Sotuvchiga o‘z shaxsiy ma’lumotlarini qayta ishlashga rozilik bildiradi, jumladan: ism, yetkazib berish manzili, telefon raqami, elektron pochta manzili. Ushbu Ofertada shaxsiy ma’lumotlarni qayta ishlash quyidagilarni o‘z ichiga oladi: ushbu ma’lumotlarni yig‘ish, tizimlashtirish, to‘plash, saqlash, aniqlashtirish (yangilash, o‘zgartirish), marketing va reklama tadqiqotlarini o‘tkazish uchun uchinchi shaxslarga uzatish, foydalanish, bloklash va yo‘q qilish. Sotuvchi Xaridorlarning shaxsiy ma’lumotlarini qayta ishlashni uchinchi shaxslarga topshirishga haqli. Xaridor shaxsiy ma’lumotlarini uchinchi shaxslar tomonidan qayta ishlash uchun alohida rozilik talab qilinmasligini qabul qiladi.
9.3. Oferta shartlarini qabul qilib, Xaridor Sotuvchi va uning xizmatlariga shaxsiy ma’lumotlarini avtomatlashtirilgan ma’lumotlar bazasi boshqaruv tizimlari hamda boshqa dasturiy va texnik vositalar yordamida qayta ishlashga ruxsat beradi.
9.4. Sotuvchi Xaridorning shaxsiy ma’lumotlari va axborotlaridan quyidagi maqsadlarda foydalanadi:
•    Xaridor oldidagi majburiyatlarni bajarish;
•    Sayt ishini baholash va yaxshilash;
•    Xaridor bilan bog‘lanish, jumladan bildirishnomalar, so‘rovlar yuborish, xizmatlar ko‘rsatish va Xaridor so‘rovlarini qayta ishlash;
•    Xizmatlar sifatini oshirish, ularning qulayligiga erishish, yangi xizmatlar va mahsulotlarni ishlab chiqish;
•    Sayt faoliyati, mahsulot sifati va xizmat ko‘rsatish sifati bo‘yicha marketing va statistik tadqiqotlar o‘tkazish;
•    Reklama va maxsus aksiya takliflarini yuborish;
•    SMS yoki elektron pochta orqali axborot xabarlarini yuborish.
9.5. Sotuvchi tomonidan olingan ma’lumotlarning oshkor qilinishi:
9.5.1. Sotuvchi Xaridor tomonidan taqdim etilgan shaxsiy ma’lumotlarni uchinchi shaxslarga oshkor qilmaslik majburiyatini oladi.
9.5.2. Sotuvchi tomonidan tuzilgan shartnomalar asosida agentlarga va uchinchi shaxslarga Xaridor oldidagi majburiyatlarni bajarish, shuningdek marketing va reklama tadqiqotlarini o‘tkazish uchun ma’lumotlarni qayta ishlashga topshirish oshkor qilish hisoblanmaydi. Shuningdek, amaldagi qonunchilik talablariga binoan shaxsiy ma’lumotlarni oshkor qilish majburiyati ham maxfiylik siyosati buzilishi hisoblanmaydi.
9.5.3. Xaridor tomonidan Saytda ochiq tarzda taqdim etilgan ma’lumotlarning maxfiyligi uchun Sotuvchi javobgar emas.
9.6. Sotuvchi xizmatlar sifatini oshirish maqsadida Xaridor bilan bo‘lgan telefon suhbatlarini yozib olish huquqiga ega. Shu bilan birga, Sotuvchi ushbu ma’lumotlarga ruxsatsiz kirishning oldini olish va ularni buyurtmalarni bajarish bilan bevosita bog‘liq bo‘lmagan uchinchi shaxslarga oshkor qilmaslik majburiyatini oladi.
9.7. Xaridor istalgan vaqtda o‘z shaxsiy ma’lumotlari ro‘yxatini so‘rash va/yoki ularni o‘zgartirish, bloklash yoki yo‘q qilishni talab qilish huquqiga ega. Buning uchun Sotuvchiga
 +998 71 205-54-54 telefon raqami orqali qo‘ng‘iroq qilib, ismi, telefon raqami, email manzili hamda yetkazib berish manzilini ko‘rsatishi yoki shaxsiy kabinet orqali yoki pochta bo‘limlari orqali xabar yuborishi lozim.
9.8. Sotuvchi shaxsiy ma’lumotlarni yig‘ish va ulardan foydalanishda O‘zbekiston Respublikasining amaldagi qonunchiligiga qat’iy rioya qilishini kafolatlaydi. Boshqa shaxslarga ma’lumotlarni taqdim etish faqat qonunchilikda belgilangan tartibda amalga oshiriladi.
9.9. Sotuvchi Xaridorning shaxsiy ma’lumotlarini oshkor qilishga majbur bo‘lishi mumkin, agar bu qonun yoki sud qaroriga binoan talab etilsa.
9.10. Agar maxfiylik siyosatida o‘zgarishlar bo‘lsa, Sotuvchi bu haqda tegishli bildirishnoma joylashtiradi.

10. Kafolat
10.1. DAFNA mebellariga kafolat muddati – 12 oy; aniq muddat mahsulotning modeli va toifasiga bog‘liq.
10.2. 12 oydan 36 oygacha kafolat faqat yapon va yevropa ishlab chiqarishidagi tovarlarga hamda rotang mebelga beriladi. Transformatsiya mexanizmlariga va metall butlovchi qismlarga kafolat – 12 oygacha.
10.3. Qoplama materiallariga kafolat material turiga bog‘liq: ekoteri – 10 000 tsiklgacha eskirish, to‘rsimon materiallar – 5 000 tsiklgacha, matoli qoplama – 7 000 tsiklgacha.
10.4. Kafolat taloni berilmaydi. Uning o‘rnini Sotuvchining CRM tizimida xarid rasmiylashtirilgan telefon raqamining qayd etilishi bosadi. Kafolat muddati davomida Xaridor Sotuvchiga murojaat qilib, shu telefon raqamini aytadi yoki chekni taqdim etadi. Raqam yoki chek bo‘yicha Sotuvchi xaridni bazadan topadi va ta’mirlashni boshlaydi, ta’mirlash imkonsiz bo‘lsa – Tovarni almashtiradi.
10.5. Ta’mirlash Sotuvchi reglamenti bo‘yicha amalga oshiriladi: haftada bir marta (payshanba kunlari) usta obyektga chiqib, Tovarni tekshiradi. Agar Tovarni joyida ta’mirlash mumkin bo‘lsa, ta’mirlash Xaridorning o‘zida bajariladi. Joyida ta’mirlash imkonsiz bo‘lsa, Tovar Sotuvchining omboriga olib ketiladi va o‘sha yerda ta’mirlanadi. Agar ta’mirlashga belgilangan kunda ulgurilmasa, u keyingi haftaga qoldiriladi.
10.6. Ta’mirlash muddati murakkablik darajasiga va nosozlik sababiga bog‘liq. Tovar ta’mirlanishi mumkin bo‘lmasa (yirik zavod nuqsoni), u o‘xshash Tovarga almashtiriladi.
10.7. Xaridor nuqsonlarni bartaraf etish uchun Tovarni menejer bilan kelishilgan kunda Sotuvchining omboriga o‘zi olib kelishga haqli.
10.8. Kafolat ta’miri faqat Toshkent shahri hududida amalga oshiriladi. Agar Xaridor Tovarni boshqa viloyatga yoki mamlakatga olib ketgan bo‘lsa, u ta’mirlash uchun faqat Toshkent shahriga murojaat qilishi mumkin; Sotuvchi boshqa viloyat va mamlakatlarga chiqmaydi.

11. Boshqa shartlar
11.1. Xaridor va Sotuvchi o‘rtasidagi munosabatlarga O‘zbekiston Respublikasining amaldagi qonunchiligi qo‘llaniladi.
11.2. Ushbu Oferta Xaridor tomonidan qabul qilingan paytdan boshlab Tomonlar uchun majburiy hisoblanadi va Sotuvchidan mahsulot sotib olish, qaytarish va almashtirish bilan bog‘liq barcha munosabatlarga tatbiq etiladi.
11.3. Xaridor ushbu shartlarni tushunganini, ularni hech qanday shartsiz va to‘liq hajmda qabul qilganini kafolatlaydi.
11.4. Ushbu Ommaviy Ofertaning har qanday qismi haqiqiy emas deb topilgan taqdirda, uning boshqa qoidalari o‘z kuchida qoladi.
11.5. Ushbu Ommaviy Oferta bilan tartibga solinmagan barcha masalalarda Tomonlar O‘zbekiston Respublikasining amaldagi qonunchiligiga rioya qiladilar.
11.6. Ushbu Ommaviy Oferta boshqa tillarga tarjima qilinishi mumkin, ammo axborot maqsadida. Bunda, ushbu Ofertaning rus tilidagi matni ustuvor hisoblanadi.